VĪNU LELU DĪNU, Ontons Kūkojs


Ai, pīškir,cylvāk, lobais cylvāk muns,
Man myuža vīnu lelu, lelu dīnu,
Kurā varātu es īkōpt dabasūs,
Pošai saulei pīsaglauzt pi byuda,

Kurā man byus symtu pōsoku,
Symtu krōsu, symtu ceiruļu,
Kas sovā teirskaneigā reita gavilē
Zemei pōri pōrklōs goldautu.

A uz tō – cik soldu mīlostu,
Na deļ mīsas, tikai dvēselei,
Ka es, apreibs zīdēšonas tvona,
Byušu mozs kai bērneņš šyupēlī.

Byušu mozs, jo mozam byut tik labi,
Kod zyni – vyss vēļ dzeivē prīkšā stōv:
Gon sulu laiks, gon brīds, gon apkyuleibas,
I varbyut paspēšu pat tū, kas garum laists ...

Ai, pīškir, cylvāk, lobais cylvāk muns,
Man myuža vīnu lelu, lelu dīnu,
Kurā varātu es īkōpt dabasūs,
Pošai saulei pīsaglauzt pi byuda!

(1986)